Алдағы бес жылда қай сала дамиды? Бүгін әкімдікке жиналған депутаттар қалалық экономика және қаржы бөлімінің басшысы Серік Нәбидің баяндамасын тыңдады. Даму картасына сәйкес экономика, әлеуметтік сала, инфрақұрылым кешені, тұрғын үй-коммуналдық шаруашылығы, экология және жер ресурстары, мемлекеттік қызмет және аймақтық даму бағыттары бекітілді. Жеті бағыт бойынша алдағы бес жылда шағын және орта бизнес 2 жарым пайызға, өңдеу өнеркәсібінің өнімі 4 пайызға артады. Ал инвестиция тарту 13 пайызға жоғарылап, құрылыс жұмыстары 90-нан 103, 5 пайызға көтеріледі. Экономика бағытының негізгі ұстанымы осы.
Әлеуметтік саланың өркендеуі де аса маңызды. Әлемдік дағдарысқа қарамастан жұмыссыздар деңгейі 0,3 пайызға төмендеуі ықтимал. Бұқаралық спортпен шұғылданатындар саны 29 мыңнан асса, алдағы 5 жылда небәрі 2 пайызға көтеріліп, 31 пайызды құрайды деп жоспарланған. Медицина қызметінің сапасы 2,6 пайызға, қазақ тілін меңгергендер саны 4 пайызға артады. Мәдениет саласының дамуы 80 пайызға жетеді. Бұл жерде әлі де шешімі табылмай келе жатқан мәселердің бірқатарына қала әкімі Бекбол Сағын тоқталды.
Ақтөбе қаласының кешенді даму картасында ірі өндіріс орындарына басымдық берілген. Ақтөбе ферроқорытпа зауыты, Ақтөбе хром қосындылары зауыты металлургия және химия саласын дамытудың негізі болады. Ал медициналық туризм Марат Оспанов атындағы Батыс Қазақстан мемлекеттік медицина университетінің базасында дамиды. Депутаттардың талқысына түскен Ақтөбе қаласының 2015-2020 жылдарға арналған даму бағдарламасын бүгін қалалық мәслихатта бекітілді. Айта кетейік, шаһардың дамуын біріздендіретін бас жоспары әлі күнге дейін бекітілген жоқ.