Ырғызда киіктер қырылып жатқанда олардың мүйізін қиып алғандар бар. Облыс бойынша осындай  бір дерек тіркелген. Қазір оқиға бойынша тергеу  жүріп жатыр. Ал Ырғыз-Торғай мемлекеттік табиғи резерватында осы уақытқа дейін 3092 ақбөкен  өлген. Соңғы үш күнде киіктердің өлу дерегі тіркелген жоқ. Өлекселерді жинауға 97 адам мен 30 бірлік техника жұмылдырылған. Алдын ала қорытынды бойынша Ақтөбедегі киіктердің қырылуына да осы ауру себеп. Өңірімізде былтыр 250 мыңға жеткен киіктердің саны соңғы санақ  бойынша 40 мыңға жетер-жетпес. Бұл өткен аптада 3092  ақбөкен қырылғаннан кейінгі есеп. Соңғы үш тәулікте облысымызда ақбөкендердің өлуі тоқтады. Қостанай облысында киіктердің жаппай қырылуына пастереллез себеп болған. Бұл туралы бүгін Ауыл шаруашылығы министрлігі хабарлады. Соңғы мәліметтер бойынша көрші облыста 81 мың 970 өлексе көмілген. Ал Ақмола облысында қырылған киіктердің саны екі есеге өсті. Бүгін жарияланған мәлімет бойынша олардың саны сегіз мыңнан асты. Кеше Ақмолада төрт мыңнан астам киіктің қырылғаны хабарланған болатын. Ал Қостанай облысындағы Жангелді ауданының аумағында арнайы штаб жұмыс істеп жатыр. Пастереллез індетінің анықталуына байланысты 22 мамырдан бері Амангелді ауданының Үрпек ауылдық округінің аумағында ветеринарлық-санитарлық шектеулер енгізілген. "Қазғарыш" агенттігі киіктердің өлімі мен "Протон" зымырандарын ұшырудың арасында байланыс жоқ деп есептейді. Әйтсе де зерттеулер жүргізілмек. Ауыл шаруашылығы министрлігінің мәліметі бойынша Қостанай облысы Бетпақдала популяциясындағы киіктер төлдейтін негізгі орын. Қазақстанда 2021 жылға дейін киіктерді атуға тиым салынған.