Бар саналы ғұмырын білім беру саласына арнаған қария баспанаға зәру. 85 жастағы Сеит Сүтемгенов қазір 18 шаршы метрлік жатақханада тұрады. Физика-математика пәнінің мұғалімі ширек ғасыр бойы мектепте бала оқытқан. Бұл еңбектің зейнеті болады деп күткенімен, әлі шағын ғана бөлмеде тұрып жатыр. Баспанада баласы мен келіні, үш немересі барлығы 6 адам жан бағып отыр. Қартайған шағындағы жалғыз арманы орындалар емес. Сеит Сүтемгеновтің ұстаздық ғұмыры 1954 жылы басталды. Ол алдымен Мұғалжар ауданының Ембі қаласында сабақ берді. Үш жылдан соң алғыр ұстаз мектеп директорының оқу-тәрбие ісі жөніндегі орынбасары болып тағайындалды. Мына суреттерге қарап оның мыңдаған шәкіртті болашаққа баулып, ұлағатты іс жасағанын көруге болады. Қазір фотосуреттердің бәрі естелік қана. Шынайы өмірде ұстаздың қадірі қашып, әлеуметтік жағдайы нашарлаған. Қазақы ғұрыппен кенже ұлдың қолында. Келін-бала, 3 немересімен бірге тұрып жатыр. Қазір "екі кезекті күтіп отырмын" дейді. Қарияның 11 баласы бар. Ұл-қызын қанаттандырып, өз алдына бөлек шығарды. Бүгінде 27 немере, 13 шөбере сүйіп отыр. Соған шүкіршілік етеді. Әйтсе де кенже ұлдың қолындағы бар тірлігі осы. Бәрі бір бөлмені паналайды. "Қонақ келсе ас бөлмеге ұйықтауға тура келеді" дейді ол. Балдағымен жүрсе де үй ішін реттеп, немерелеріне қарайды. Күндіз теледидар көріп, уақыт өткізеді. Үш бөлмеге ортақ дәретхана да осы пәтерге тиесілі. Сондықтан кірер есік күні-түні жабылмайды. Мазасыз осы тіршілік қарияны шаршатты. Үй сұрай барғанында жергілікті билік ауылдағы баспананы сылтау еткен. Мүгедектігі бойынша тұрғын үй қорында 112-ші кезекте тұрған Сеит атаның қай кезде баспаналы болатыны белгісіз. Соңғы рет 2003-2004 жылдары өтініш жазғандарға пәтер берілген. Ал қария 2006 жылы кезекке алынды.