Бүкіл қала жұртшылығы саулығын тілеген Темірлан Сандыбаевтың мүрдесі кеше әкесінің қолына тапсырылды.  Бауыр еті баласынан айрылған Нұрлыбай Сандыбаев бүгінгі күнге дейін оның үйге аман-есен оралатанына сенген. Сот-медициналық сатараптама жасалғаннан кейін де Нұрлыбай Сандыбаев баласының денесін өзі қарап шыққан. Темірлан кісі қолынан ажал құшты деп отыр ол. Темірланның жансыз денесі кеше кешкі сағат бестер шамасында Келешек ауданындағы Қарғалы өзенінен табылды. Мүрде су бетіне қалқып шыққан.  Мәйітті бірінші болып сол маңдағы "Электрик-2" бау-бақша ұжымы аумағында  саңырауқұлақ теріп жүрген 45 жастағы Василий Федосенко аңғарады. Ол бірден көмекке көршілерін шақырған. Темірлан 10-шы қазан күні үйінің маңында ойнап жүрген жерінен жоқ болды. Келесі күннен бастап оны полиция мен құтқарушылар, әскерилер, еріктілер табандарынан таусылып іздеді. Көкке ұшақ та көтерілді. Бірақ лай судағы   бармақтай баланың денесін байқау мүмкін емес еді. Бүлдіршіннің дәл қай уақытта қайтыс болғаны белгісіз. Оны да сот-медициналық сараптама қортындысынан білетін боламыз. Алдын ала нәтижеге сүйеніп, облыстық ІІД-і Темірланның денесінен зорлық белгілері анықталмағанын алға тартты. Темірлан өте ақылды, сақ бала болатын. Оның өздігімен ұзаққа кетіп, адасуы  мүмкін емес еді дейді туған-туысы. Темірлан Сандыбаев осы уақыт ішінде атаның емес, адамның баласы болып кетті. Оның тағдырына алаңдаған әр ақтөбелік, баланы соңғы сапарға шығарып салуға қатыса алады. Сәбидің денесі жер қойнына ертең табысталады.