Ақтөбеде халықтар бірлігі мерекесі спорттық шарамен басталды. Қаламызда бүгін мамыр мерекелеріне арналған ұзақ жылдан бергі тұңғыш жартылай марафон өтті. 5 мыңнан астам қала тұрғыны жас шамасына қарамастан әкімдік алаңында жиналып, жаппай жүгірді. Таңертең әкімдік алаңында жиналған халықтың көңілі көтеріңкі, мерекелік. Марафон басталғанша қимыл қозғалыстарын жасап, бой жазып алды.  Жүгірушілердің жас шамалары әр түрлі. Мектеп оқушылары, студенттер, еңбекші ұжымдар, зейнеткерлер - мыңдаған адам марафонға қатысуға ниет білдірген. Отбасымен жүргендер көп. Қатысушылар өзінің шама-шарқына қарай үш түрлі қашықтықты таңдады. Ерлер 21, әйелдер 10 шақырымды бағындыруы тиіс. Марафоншылар кеткен соң, 10 минуттан кейін 3 шақырымдық жаппай бұқаралық жүгірулер басталды. Ереже бойынша, желаяқтар облыстық әкімдік алаңынан тұңғыш президент атындағы саябаққа дейін жүгіреді. Әрі қарай 10 және 21 шақырымдық межені орындайтындар саябақты бірнеше рет айналады. Тұрғындардың көбі Сазды аялдамасына жеткенше, ентігіп қалды. Жаппай бұқаралық жүгіру кезінде жол бойында полиция қызметкерлері мен жедел жәрдем бригадасы кезекшілік етті. Орталық даңғылдың бойында көліктердің қозғалысына тиым салынған. Марафон жеңімпаздары ерлер мен әйелдер арасында жеке-жеке анықталды. 1,2,3 орын иелеріне қаладағы фитнес клубтарға бір айлық тегін абонементтер сыйға тартылды. Ең жас және ең егде тартқан желаяқтар да жүлдесіз қалмады. Жаппай жүгірулерден мәре сызығын бірінші болып кескен 6 ер және 6 әйел адам спорт клубына бір күн  тегін барады.