Бүгін бес жыл бойы адам тәнін емдеуді үйренген түлектер  диплом алды. Ақ халатты абзал жандардың қатарын толықтыратын жастар университет бітіргенімен магистратура немесе интернатура оқиды. Алғашқысы білім мен ғылымға, кейінгісі нағыз маман болуға жол ашады.

Бес жыл бойы жақсы оқып, қоғамдық жұмысқа белсене араласқан Нұркелді Бақтыбаев бүгін үздік дипломын қолға алды. Ол бала жастан ақ халат киіп, адам тәнімен қатар жанын емдеуді армандайтын. Арманы оны Қызылорда облысы, Жалағаш ауданынан Ақтөбеге әкелді. Енді интернатурада білім алып, нағыз маман атануды көздеп отыр. Биыл Жалпы медицинаны 468 түлек  тәмамдады. Олардың 35-і үздіктердің үздігі. Сонымен қатар Марат Оспанов атындағы Батыс Қазақстан мемлекеттік медициналық университетінің басшылығы 44 түлекті алғыс хатпен марапаттады. Баласын білімге құштар, мамандығына адал болуға тәрбиелеген 8 ата-ана да құрметке ие болды. Айта кетейік, жыл өткен сайын өңірдегі оқу орнында студенттер саны артып келеді. Бүгін қолына диплом алған студенттер - жартылай маман. Олар толыққанды дәрігер атану үшін әлі екі жыл білім алады. Ақ халат киіп, адам тәнін емдейтіндер де, білім қуып оқытушы-ғалым атануды қалайтындар да екі ай демалыста бір таңдауын жасайды.