Үш жарым ай бұрын  із-түссіз жоғалып кеткен ақтөбелік офицер Арман Сұрағановтың жақындары тергеу амалдарының баяу жүріп жатқанына наразы. Облыстық қорғаныс істері жөніндегі басқармасының кезекшісі болып жүріп жоғалған қарапайым офицердің бүгін туған күні. Отбасылы баласының аяқ асты жоғалып кеткеніне шыдамаған анасы бүгін бұқаралық ақпарат құралдарын жинап, шағымданды. Бүгін 33 жасқа толып жатқан Арман Сұрағанов 15- мамыр күні түнгі кезекшілік кезінде ұшты-күйлі жоғалып кеткен болатын. Оның анасы Қалима Сұрағанова іздестірудің еш  нәтиже бермей отырғанына налиды. Тергеуге көңілдері толмаған  жақындары  амалсыздан бақсы, балгерлерге барған. Ал зайыбы Қаракөз Арғынбаева осы үш жарым айдың ішінде біраз мекеменің есігін қағыпты. Ол Астанадағы бас прокуратура мен қорғаныс министрлігіне арызданыпты. Сенат депутаттарына жүгініп, бұл істің дұрыс тергелуін қадағалауды өтінген. Тіпті облыс әкімінің де қабылдауында болған. Сондай-ақ осыған дейін қала шетіндегі саяжайлардан көрдім дегендердің де сөздері жалған болып шықты дейді туыстары. Десе де полицейлер іздестіру жұмыстарының үздіксіз жүріп жатқандығын айтып отыр. Облыстық ішкі істер департаменті бұл іс бойынша "екі түрлі болжам бар"- дейді. Бірақ, тергеу амалдарының құпиялығына сәйкес ашып айта алмаймыз", - деп шектелді. Айта кетелік, қорғаныс істері жөніндегі басқармасының кезекшісі болған Арман Сұрағановтың ғайыптан жоғалып кетуінен соң жауапты органдарда өзгерістер болды. Облыстық қоғаныс істері жөніндегі басқармасының бастығы мен Ақтөбе гарнизоны әскери полициясының басшылары қызметтерінен аластатылған болатын.