Бүгін "Орман-Ертегі" және  "Қонжық" балабақшаларының  бұрынғы есепшісіне қатысты сот үкімі шықты. Мемлекет қаржысын жымқырған 45 жастағы Дәмегүл Бұхарбаева сот залынан бірден жалпы тәртіптегі  колонияға кетті. "Орман ертегі" мен "Қонжық" мектепке дейінгі ұйымдарының  бұрынғы бухгалтеріне қатысты қылмыстық іс  биыл наурыз айында қозғалған  болатын. Дәмегүл Бұхарбаева "Сеніп тапсырылған бөтеннің мүлкін иемденді және ысырап жасады" деп айыпталды. Бүгін судья оқыған үкім оның өзі ғана емес, туыстарын да есеңгіретіп тастады. Бүгін сот оны  7 жылға дейін бас бостандығынан айыру туралы үкім шығарды. Бұған қоса  ол мемлекет пайдасына 370 000 теңге айыппұл төлеуі тиіс. Дәмегүл Бұхарбаева  қылмыстық кодекстің 176-бабы бойынша сотталды. 45 жастағы әйелдің кәмелеттік жасқа толмаған 3 баласы бар. Естеріңізге  сала кетейік, Дәмегүл Бұхарбаева екі балабақшада  есепші болған 2008-2013 жылдар аралығында бақшалардың  есеп-шотына ата-аналардан  түскен ақшаны ұрлап, мемлекетке жалпы сомасы 71 млн.теңгеден астам залал келтірген. Ал ата-аналар ақшаны балаларының бақшада тамақтануы үшін төлеген.