Әзира Төлепова осыдан екі жыл бұрын денсаулығы сыр беріп, инсулть алған. Содан бері талай аурухананың табалдырығын тоздырған қала тұрғыны осыдан бір күн бұрын келеңсіз жағдайға тап болды.  Жаңақоныс ауылынан салынған облыстық ауруханаға жетемін деп №21-қоғамдық көлікке мінген әйелді кондуктор мен жүргізуші тас жол бойынан түсіріп кеткен.  Таяққа сүйеніп, әзер қозғалып жүрген Әзира Төлепова тас жол бойынан ауруханаға дейінгі жолды әрең еңсерген.Ақтөбе облыстық ауруханасы «100 аурухана» мемлекеттік бағдарламасы аясында тұрғызылды. 4 қанаттан тұратын зәулім ғимарат ішінде 20-дан астам емдеу-диагностикалық бөлімше бар. Өңірдегі бірегей ауруханада қазір 600 адам жұмыс жасайды. Облыстық аурухананың бас дәрігері Самат Данияровтың айтуынша, қазір 350 науқас ем алып жатыр. Оларға келіп-кететіндерді қоспағанда, ауруханада 500 студент тәжірибеден өтіп жатыр. Барлығының бірдей жеке көлігі жоқ. Таксимен жету де қалтаға күш түсіреді. Қарапайым халық үшін ең тиімдісі қоғамдық көлік. Аурухана қасынан аялдама қажет екендігін айтып, басшылығы қалалық әкімдікке бірнеше рет хат жолдаған. Мәселе жазға дейін шешілуі тиіс болатын. Жаздың ортасына жеттік,  ештеңе өзгерген жоқ. Бірақ, бүгін қалалық тұрғын үй-коммуналдық шаруашылық бөлімі басшылығы жақсы хабар жеткізді.