Мектеп оқушыларының арасынан құрт ауруы шықты. №13 орта мектептің 8-ші класс оқушысы қыркүйек айынды суық тиіп ауырып, содан қайта мектепке оралмады. Кейін дерті асқынып, туберкулез диагнозы қойылған. Қазір мектептегі мыңнан астам оқушы арнайы тексеруден өтіп жатыр. Ата-аналар болса, мектеп ішінде баласынан қан алып, ескертусіз тексеру бастағандардың әрекетіне наразы. №13 орта мектептің 8 класс оқушысынан туберкулез дерті бір апта бұрын анықталды. Ол қыркүйек айының 17-сі күні суық тиіп ауырып, кейін өкпесі қабынып, емделген. Арты құрт ауруына ұласқан. Ал қазір осы мектептегі медбике 1148 оқушыны медициналық тексеруден өткізуге кіріскен. Санитар мамандар келіп, мектеп ішіндегі тазалықты қарапты. Түрлі сынамалар алған. Ал мектеп директоры Асқар Күштаевтың айтуынша, 8-ші класс оқушысының жасы 18-де екен. Ол бірнеше жыл бойы кластан класқа көше алмаған. Бұл мектепке келмес бұрын ол Алға ауданында тұрған екен. Бейресми деректерге сүйенсек, туберкулез дерті қала мектептерінде жиі тіркеле бастады. Қазір тағы бірқатар мектептердің оқушылары медициналық тексеруден жатыр.