Сәуірдің бірінде қаланы тазалау, ауылдық жерлерді көркейту, көгалдандырудың  екі айлығы басталады. Бұл туралы бүгін қала әкімі Ерхан Омаров мәлімдеді. Екі айлықтың бірінші кезеңінде қыс бойы жиналған қоқыстар тазаланып, саябақтар көгалдандырылады. Әр бейсенбі мен сенбі тазалық күні. Бұл сәуірдің бірінен бастап күшіне енеді. Қалалық әкімдікте өткен басқосуға мемлекеттік мекемелер, кәсіпорындар мен ұйымдардың, кәсіпкерлік нысандары мен оқу орындарының басшылары жиналды. Жарияланған екі айлық кезінде олар қаламыз бен іргелес жатқан елді мекендерді  тазалау, қоқыс шығару, көркейту, көгалдандыру жұмыстарын атқаруға атсалысулары қажет. Сәуірден бастап қала тазалығы қатаң бақылауға алынады. Қандай да бір санитарлық тазалықты бұзған тұрғындар немесе мекемелерге бірден әкімшілік айыппұл салынады. Айыппұл көлемі, жеке тұлғалар үшін 19 мың теңге, кіші кәсіпорындарға 39 000, орта кәсіпорынға 79 мың, ал ірі кәсіпорындарға 237 840 теңге. Өзен арналары мен айналма тас жолдарын, гүл бақтары мен саябақтарды қоқыстан тазарту 31 оқу орнына жүктеліп отыр. Олар кесте бойынша күнделікті жинауға шығады. 2013 жылы қала бойынша 300-400 тонна қоқыс шығарылса, өткен жылы шығарылған  қалдықтар 400-500 тоннаға жеткен. Көшелер мен  жеке тұрғын үй массивінде  рұқсат етілмеген жерлерге қоқыс жинау және қоқыс үйіндісін  қалыптастыруға тыйым салынады. Екі айлық кезінде қалалық қоқыс палигонына қатты тұрмыстық қалдықтарды қабылдау ақысыз. Ал, қаланы гүлдендіру жұмыстары Жеңістің 70 жылдығына сәйкес алдымен мереке тойланатын алаңдар мен ескерткіш маңдарында жүргізіледі. Санитарлық тазалау шаралары 31 мамырға дейін жалғасады.