Қазақстандықтар Ресейдегі сауданы қыздырып тұр. Бұған рубльдің  құнсыздануы себеп. Шекараларда көліктер кептеліп жатыр. Жұрт көрші елден көліктен бастап ұсақ-түйек керек-жараққа дейін сатып әкеле бастаған. 62 жастағы Аркадий Орынбор қаласының тұрғыны. Зейнетке шыққалы Камаз айдап, жүк тасумен айналысады. 1 айдан бері екі ортаға тауар тасып, ақша тауып жүр. Көлігіне  кілемнен бастап, жиһаз, тұрмыстық техникаларға дейін  тиеп әкеледі. Бұл жолы Ақтөбеге тапсырыс бойынша көлік  жеткізбек. Алайда, 2 күннен бері діттеген жеріне жете алмай, Жайсаң көлік бекетінде тұр. Рубльдің құны төмендегелі ақтөбеліктер де көрші елге жиі қатынай бастаған. Азық-түліктен бөлек, тұрмыстық техника мен көлік  арзан. Қазақстандықтар әсіресе көрші елдегі  көлік саудасын қыздырған. Мәселен  келесі кейіпкеріміз Орынбор қаласына барып, арзан көлік сатып алмақ. Ақтөбеде  15 мың доллар тұратын көлікті, ол Орынбор қаласынан 8 мың долларға табамын дейді. Бұл мереке күні шекарада болған жағдай. Ары-бері ағылған көлікте есеп жоқ. Кептелген көліктердегі жұртшылық тексерудің баяу жүріп жатқанына наразы. Кеше  бір мезетте 300-ден астам көлік тексеруден өткен. Облыстық мемлекеттік кіріс департаментінің  мәліметіне сай соңғы 1,5 айдың ішінде Ресейден  облысқа 726 көлік әкелінген. Бұдан қазынаға түскен салық 81 млн.теңге. Әкімшілік полиция басқармасы, тіркеу бөлімі басшысының орынбасары Оралхан Сансызбаевтың айтуынша Ресейден жақында әкелінген тағы 500 көліктің құжаты  салықшыларға  тапсырылған.