Қаңтардың 6-сы күні Хайдар Кенжембетовтың жалғыз баспанасы өртеніп кеткен болатын. Мега Шығыс базары маңындағы бау-бақша ұжымындағы екі бөлмелі үйді ол 10 жыл бұрын салған. Үш балалы отбасы қазір туыстарының үйін паланап отыр. Олар көмек сұрап, қала тұрғындарына өтінішін айтқанда бірқатар азаматтар киім-кешек пен тамақ, тұрмыстық заттар берді. Қазір құрылыс жүргізу мүмкін емес. Отағасы көктем келе қайта үй салуды жоспарлап отыр. Көршілері де көмектесуге әзір екен. Ал Шернияз көшесіндегі №80-ші барақ үйдің тұрғындары қайырымды жандардан шапағат күтеді. Өртенген екі пәтердің иелерінің әзірше жағдайын сұрап, хабарласқан ешкім болмай тұр. Қызыл жалын от алғанда қолына іліккенін алып далаға қашқан екі отбасы қазір ауыстырып киер киімді де таппай отыр. Зардап шеккендер ішер тамақ пен баспанаға мұқтаж. Ал "Қызыл Ай" қоғамының облыстық филиалы бүгін өрт кезінде жалғыз баспанасынан айырылған екі адамға гуманитарлық көмек көрсетті. Әсия Рахметованың үйі 26-шы қаңтар күні жанып кеткен. Құжаттарын ғана алып үлгерген отбасы танысының үйінде жан сақтап отыр. Үш немересі, баласы мен келіні он күннен соң ол үйден де кетуі қажет. Уақытша шаңырағының астына алған таныстарының талабы осы. Әсия Рахметова көмек сұрап, Қарғалы селолық округі әкімдігіне барған. Әзірге еш хабар жоқ. Қолдан келген көмекті "Қызыл Ай" қоғамының филиалы берді. Бүгін бұл отбасы төсек орын мен гигиеналық заттар алды. Мұндай көмек Алға ауданы, Маржанбұлақ ауылында тұратын Елмұратовтар отбасына да берілді. Үйінде газ баллоны жарылуынан зардап шеккен бұл жанұяға да заттай, қаржылай көмек берілді. Айта кетейік, жыл басынан бері "Қызыл Ай" қоғамының облыстық филиалына 3 отбасынан өтініш түскен. Барлығының да баспанасы өртенген.