Нұр Ақтөбе ауданындағы мектептің төбесін жабуға "АқтөбеЭлектроСетьСтрой" ЖШС тапсырыс берген. Қарашаның 16-сында кірісіп, құрылысшылар жұмысты 28-желтоқсан күні 100 пайыз орындап, тапсырды. Жалдаған жұмысшыларына серіктестік әлі бір тиын да төлемеген. Жиналғандардың сөзінше, мектептің төбесі 902 шаршы метрді құрайды. Әр шаршы метрі үшін келісілген баға 1300 теңге. Жұмысқа қабылданар алдында қауіпсіздік техникасы туралы құжатқа қол қойылған. Келісімшарт та бар. Алайда құжаттың 2-ші данасын мердігер мекеме жұмысшыларға бермеген. Құрылысты қысқа мерзімнің ішінде аяқтау үшін, күні-түні аянбай еңбек еттік, деген азаматтар қазір ақшадан тарлық көріп отыр. "АқтөбеЭлектроСетьСтрой" ЖШС-і басшылығы болса, есепшот фактураның болмауы жалақыны кешіктіруге себеп деп ақталды. Құжаттар реттелген бойды мекеме жұмысшылар алдындағы қарызынан құтылуға әзір. Облыста жұмысшыларының жалақысын кешіктіріп жатқан мекемелер баршылық. Облыстық еңбек инспекциясының мәліметіне сай, қарыз 33 миллион теңгеге жуық. Жұмысшыларына дер кезінде еңбекақысын төлемей отырған компаниялардың арасында "Ойл техногрупп" ,"Ақтөбемұнайсервис" секілді ірі кәсіпорындар да бар.