Доллар бағамының көтерілгенін желеу етіп, "қиындыққа тап болдық" деген кәсіпкерлермен бүгін облыс әкімі Бердібек Сапарбаев кездесті. Қара алтын бағасының құлдырауы да бірқатар мұнай компаниясының шырқын бұзған. Бұл жиында кәсіпкерлердің ғана емес, қарапайым жұмысшылардың  тағдыры  сөз болды. Жиын кезінде тағы бір жайсыз хабар таратылды. Бұған дейін де 200-ден астам адамды жұмыстан босатқан "Ұлы Қабырға" жауапкершілігі шектеулі серіктестігі тағы да 295 адамды қысқартуға шешім қабылдаған. Қазан айында қысқартамыз деп кесіп айтқан басшы облыс әкімінің "жұмысшылар қайда барады, олардың ертеңгі өмірі не болады" деген сұрағына мүлде жауап бере алмады. Тіпті, жеке кабинетте айтамын деп қайта-қайта тура жауаптан жалтарды. "СНПС-Ақтөбемұнайгаз" АҚ-ның бас директоры бұл жиынға келмеді. Алпауыт компаниядағы даму мен атқарылып жатқан істер жайын бас директордың орынбасары Тақталифум Есенғұлов баяндады. Оның айтуынша, қазір бұл ірі компанияда 6600-ден астам жұмысшы бар. Оның 115-і қытайлық маман. Биыл мұнай өндіру көлемі азайғанымен, газ өндіру 1 миллиард текше метрге дейін артқан. Бұл компанияда қазақстандық үлестің салмағы 30 пайыз. Ал облыс әкімінің орынбасары Сара Нұрқатова өңірдегі жұмыссыздық пен  кәсіпкерлердің бережағы туралы айтты. Биыл жыл басынан бері 1800-ден астам адам жұмыссыз қалған. Ал кәсіпкерлердің қарызы 62 миллион теңгеден асты. Әсіресе, мұнай компанияларының жағдайы қиын. Олар тіпті, үшжақты меморандумды орындай алмай отыр. Айта кетейік, жұмысшыны қысқартуға бел буған компания екі ай бұрын әкімдікке хабарлауы тиіс. Себебі, жұмыссыз қалған адамдарды мемлекеттік бағдарламалар арқылы қайта оқыту, көмек беру тетіктері қарастырылады.