Осы жылдың аяғында қаламыздың Батыс-2 ауданында Назарбаев зияткерлік мектебі іске қосылмақ. Ал аталмыш білім ордасындағы оқу процесі келер жылдың басында басталады деп күтілуде. 720 орынға арналған оқу орнында оқушылардың білім алуына барлық жағдай жасалған. Құны 3 млрд. теңгені құрайтын жоба құрылысын өткен жылы "А-Еврострой" ЖШС қолға алған болатын. Заманауи үлгіде салынған ғимарат қазірдің өзінде 90 пайызға дайын. Мұндағы оқу кабинеттерінің барлығы да жаңа үздік технологиялармен жабдықталған. Балалардың бос уақытында спортпен шұғылдануы үшін арнайы спорт алаңдары, сондай-ақ жасанды мұз айдыны да қарастырылған. Назарбаев зияткерлік мектебіне қабылдау осы жылдың қараша айында басталады. Оқушыларды іріктеуді Астанадан келетін арнайы мамандар жүзеге асырмақ. Ал, байқаудың өзі 2 кезеңнен тұрады. Сондай-ақ іріктеу барысында негізгі басымдық математика, физика, ағылшын пәндеріне берілетін болады. Назарбаев зияткерлік мектебінде қала оқушыларымен қатар, ауыл жасөспірімдері де білім алады. Осы мақсатта оқу орны жанынан 120 орындық арнайы жатақхана салынған. Білім ошағында Кембридж университетінде білім алған жергілікті ұстаздар сабақ беретін болады. Сондай-ақ шет елден де арнайы мамандар келеді деп күтілуде.