Картоп пен жергілікті жердің өзге де көкөністері қысқа сапалы сақталуы тиіс. Осылай деген сарапшы- аудиторлар, қалалық маслихат депутаттары, кәсіпкерлік және ауыл шаруашылығы бөлімдерінің басшылары бүгін "Ақтөбе- Көкөніс" көкөніс қоймасын аралап көрді. Қалалық әкімдікте құрылған жұмыс тобы әсіресе картоптың қара дақ түспей, суланбай сақталуына көңіл аударды. 2 мың тонна көкөніс сақтай алатын "Ақтөбе-Көкөніс" қоймасына қазір жергілікті "Пригородный" ЖШС-нен картоп әкелінген. Мұнда сапалы сақтау үшін желдетіп, қатыратын жүйе қосылған. Облысқа биыл қысқы қор үшін республикалық бюджеттен 596 миллион теңге бөлінген. Бір ғана жергілікті шаруашылықтан облыстық бюджеттен бөлінген тағы 5 млн теңгеге 100 тонна картоп сатып алынған. Алда тағы 50 теңгеден 2100 тонна картоп алынуы тиіс. "Батыс-Агро-2008" ЖШС-нің директоры Батыр Артықовтың айтуынша, биыл 200 тонна сәбіз, күріш, қырыққабат, 400 тонна жуа, 50 тонна қарақұмық пен қызылша, 300 тонна қант сақталуы тиіс. Жергілікті шаруашылықтар биыл ақтөбеліктерді картоппен, көкөніспен қамтамасыз етпек. Дегенмен, қантты Ресей, күрішті Қызылорда жеткізбекші. Айта кетерлігі, қаладағы ірі үш көкөніс сақтау қоймасына қырыққабат пен сәбіз сақтауға әлі түскен жоқ.