Қаламызда жас аяқ доп шеберлерін европалық деңгейде дайындайтын арнайы орталық ашылды. "Ақтөбе" футбол клубы жанында дүниеге келген бұл мектеп алдағы уақытта 250-ден астам жеткіншекті қабылдауға қауқарлы. Орталықта жасөспірімдерді біліктілігі жоғары 10 бапкер жаттықтыратын болады. Мұндай орталықтар Қазақстанның алты қаласында ашылған. Соның бірі Ақтөбе. Мұнда жаттығып, футбол өнерінің қыр-сырын үйренем деуші әрбір балаға оқу ақысы тегін. Тек талапкердің жасы 8-ден асуы тиіс. Алдағы жылдары қаламызда жеткіншектерге арналған бірнеше спорттық нысан бой көтермек. Соның бірі Әуе қалашығы ауданында іске қосылатын футбол алаңы. 600 адамға арналған алаң құрылысына қазынадан 40 млн. теңгеден астам қаржы бөлінген.