Шаһарымызда "Трансэнерго" АҚ-на қарыз борышкерлер көп. Бүгін жеке сот орындаушылары өз қарыздарын төлеуден жалтарып жүрген ақтөбеліктердің борыштарын мәжбүрлеп өндіруге шықты. Тәртіп сақшылары қыстай жылынып, одан қалса жылы суға жуынып, бірақ, ақысын төлеуден қашып жүргендердің көліктерін жол бойында құрықтап, айып тұрағына жөнелтті. Өткен айда мойынындағы 60 мың теңге қарызы үшін бір ақтөбеліктің көлігі айып тұрағына жөнелтілген. Оның қатарын бүгін 44 жастағы Бағлан Айымбетов те толықтырды. Бұл борышкердің ыстық су үшін 130 мың теңгеге жуық қарызы бар. Судың сұрауы бүгін жол үстінде алдынан шықты. Қазір жеке сот орындаушылары жалпы құны 7 млн. теңгеден асатын 147 құжатты қарап жатыр. Оның 4,5 млн. теңгесі жеке, қалғаны заңды тұлғаларға қатысты. Жыл басынан бері жеке сот орындаушылары 1,5 млн. теңгеден астам қаржы қайтарған. Жеке сот орындаушылары барлық борышкерлерге қарыздарын уақытылы төлеуді ескертеді. Себебі көлігіңіз осылай аяқ астынан айып тұрағына жол тартса, тағы да біраз шығындалуға тура келеді. Ол кезде төленбей жүрген борышыңызбен қатар жеке сот орындаушыларына бір, айып тұрағына көлігіңіз тұрғаны үшін екі, тұтқындағы мүлігіңізді шығарып алу үшін үш рет қосымша тағы ақша төлейсіз. Бұл қаржының барлығы борыш құнына байланысты есептеледі. Бұдан өзге борышкерлердің қарызын жалақысы мен зейнетақысынан ұстау шаралары да жүргізіліп жатыр. Алдағы айда баласына алимент төлеуден бас тартқандар және салық төлемей қашып жүргендермен күрес басталады.