Қала әкімі Ілияс Испанов бүгін 9 айды қорытындылады. Үш ай бұрын жаңа қызметке тағайындалған әкімнің бұл алғашқы есебі. Қала басшысының  сөзіне сүйенсек, Ақтөбеге жыл басынан бері 87 миллиард теңгеден астам инвестиция тартылған. 300 мың шаршы метрге жуық тұрғын үй пайдалануға беріліп, "Нұрлы жол" бағдарламасымен бөлінген 7 миллиард теңгеге жуық қаржының басым бөлігі игерілген. Өндіріс, инвестиция тарту, құрылыс, ауыл шаруашылығы салалары  өткен жылмен салыстарғанда 15-40 пайызға артқан. Есеп беру кезінде қоқыс өңдеу цехының құрылысы басталғаны, келер жылдың сәуір айында пайдаланылуға берілетіні туралы мәлім болды. Ал 2018 жылы үш ауысымды мектеп мәселесі түбегейлі шешіледі. Қысқа әрі нұсқа есеп беруден соң өңір басшысы Бердібек Сапарбаев жер телімін беру жайын сұрады. Қала бойынша кезекте тұрған 4 мың адам жыл соңына дейін жер телімін алып болуы тиіс, ал қазір бар болғаны 1800-ден астамы 10 сотық жерге қол жеткізіп отыр. Кезек қаладағы көпқабатты тұрғын үйлердің сырт келбетіне де келді. Облыс әкімі Бердібек Сапарбаев Батыс -2 ауданының сары, "Нұр Ақтөбе"  ауданының көк түспен есте қалатынына көңілі толмайтынын айтты. Тағы бір белгілі  болғаны, қалалық  әкімдікті  жарықтандыру жұмысы жүргізілген. Енді қос әкімдіктің сырт келбеті түнде айрықша жанып, түрлі түске боялып тұрмақ. Қала дамуы мен кемшіліктер жіпке тізілген тартысты әңгіме кезінде кәсіпкерлік палатасының төрағасы Нұрлыбек Мұқанов, облыстық білім басқамасының басшысы Сәуле Өмірбекова секілді бірқатар жауапты басшылар әлеуметтік желіні серік етіп отырды. Ал кейбірі қалың ұйқыға кеткен. Бұл  жиналыстарда  жиі байқалатын көрініске айналғанына да көп болды.