Бұл қала адамдардың мекен етуіне өте қолайсыз. Депутаттар жолдардан жерініп отыр. Бүгін қалалық әкімдікте Ақтөбедегі асфальттардың жай-күйі туралы жиын өтті. Оған қатысқандардың бірі облыстық мәслихат депутаты Асқар Садықов әріптестеріне, қоғамдық кеңес мүшелеріне тырнақшаның ішінде, өзімізді қорлауға бұдан былай жол бермейік, деп үндеу тастады. Ақтөбеге төселетін асфальттың ғұмыры 6 айдан аспайды. Қыркүйек-қазан айларында, тіпті қарашада жолдарды жөндеп болып жатқанда қар жауады. Қаңтар, ақпан, қардың астында жатады. Наурыз, сәуірде қызыл сумен бірге құрдымға кетеді. Миллиардтап бөлінген ақша да жоқ, жол да жоқ. Жол салушылардың бұл сиқырын әлі ешкім ұқпады. Бүгін қалалық әкімдікте облыс, қала депутаттары жиналып, жолға жауапты мекеме басшыларын сұрақтың астына алды. Жолдармен әкім де жүреді, қара да жүреді. Ешкімнің жетісіп отырмағаны белгілі. Жолдарды жөндеу жұмыстары 15-ші сәуірде басталуы керек. 10 күн қалды. Алайда әлі қандай мекеменің қандай жұмыстарға жауапты екені белгісіз. Бәрі бір-біріне сілтеп отыр. Мемлекеттік автоинспектор Нұрлан Көбегенов асфальттағы ойықтарды бітеу тұрғын үй коммуналдық шаруашылық бөлімінің құзырында, дейді. Олар мердігерлер арасында байқау жариялауы керек. Жол бойында көлік апатының алдын алуға, жол ережесінің сақталуына полиция жауапты. Логикалық тұрғыдан қарасақ, авариялық жағдай туғызатын ой-шұңқырларды қоршау да автоинспекторлардың міндеті болуы керек. Ақтөбе тұрғындарын қажытып біткен үш негізгі проблема бар. Жол, қоғамдық көлік, көшені жарықтандыру. Ал былтырғы атқарылған жұмыстар статистикасына сенсек...Олай болса, дәл қазір көшедегі көрініске не дейміз? Жолдар қайда? Енді кімді жазалаймыз? Қалалық полиция басқармасы жолаушылар көлігі, автомобиль жолдары бөліміне 1 ай ішінде жағдайды қалыпқа келтіруге ұйғарым берген. Белгіленген мерзімде ештеңе өзгермесе, мекемеге қатысты іс сотқа жолданады.