Жол-халықаралық тауар айналымының күре тамыры. Өңіріміздің сауда-экономикалық қатынасы артқан сайын жол жабынына салмақ түсіп отыр. Қалай болғанда да өңірімізде жолдың жыры бітер емес. Сондықтан жол жөндеуші кәсіпорындардың жұмысы үнемі бақылауда болуы тиіс. Бүгін өңір басшысы Оңдасын Оразалин бірқатар нысанда болып, құрылыс жұмыстарының жүру барысымен танысты. Аймақ басшысы барған алғашқы нысан "Ақтөбе-Атырау" тас жолының Ақтөбе-Қандыағаш қаласы аралығындағы бөлігі. Бұл екі аралықта бұған дейін жол болған жоқ деп айту шындыққа жанасады. Әбден ескірген асфальтты жаңалау жұмыстары былтыр басталды. Мердігер "Сине Мидас Строй" түрік компаниясы. Жоба құны 39,7 млрд.теңге. Жолдың бір жағы маусымның аяғында дайын болуы тиіс. Құрылыс толықтай күзде бітуі керек. Ал көпір құрылысы келесі жылға қалып отыр. Тұрғындардың бас ауруына айналған жолдардың бірі "Оңтүстік айналма жолы". Қала шетіндегі Ясный ауылы мен 41-бекет тұрғындары жөндеу жұмыстарының сағызша созылғанына наразы. "Оңтүстік айналма жолдың" құрылысына жалпы 7,5 млрд. теңге бөлінген. Ал жөндеу жұмыстарының кешеуілдеуіне мердігер кінәлі, дейді аймақ басшысы. Оңдасын Оразалин Ясный ауылы маңындағы учаскедегі құрылысты 20-маусымға дейін аяқтауды тапсырды. Батыс-2 ауданындағы Тәуелсіздік даңғылында 8 жолақты жол салынып жатыр. Мұстафа Шоқай көшесіне дейінгі аралығы күзге дейін тапсырылуы тиіс. Себебі оқушылар мектепке барады. Қалғаны келесі жылға қалып отыр. Батыс айналма жолының құрылысына 2,2 млрд теңгеге жуық қаржы бөлінді. "Самара-Шымкент" автожолы мен "Ақтөбе-Мәртөк-РФ" шекарасы аралығына да жол тартылып жатыр. Мұндағы мақсат-транзиттік жүк көліктері үшін қолайлы жағдай туғызу.Елек пен Қарғалы өзендері арқылы өтетін екі көпірді кеңейту жұмыстары да жалғасады. Ал жол құрылысы өңір басшысының жеке бақылауында. Әсіресе ірі жобалар басты назарда. Жұмыстың сапасы үшін сұраныс қатал болмақ.