Жетім көрсең жебей жүр. Анастасия Нелюбова 31 жаста. "Жайсаң" жетімдер үйінің түлегі. Интернаттан кеткен 16 жыл бойы сенделумен келеді. Қазір үш баласы бар ана бір бөлме болса да баспанаға мұқтаж. Бүгінге дейін Мәртөк ауданында тұрып, ол жақта әлеуметтік мәселелерін шеше алмаған әйел балаларын алып, жақында облыс орталығына келген. Бар үміті қайырымды жандарда. Жұлдыз Мейірханова сабақтайды. Анастасия Нелюбова- тұл жетім. Әке-шешеден ерте айрылған келіншектің бұл жалғанда еш туысқаны жоқ. Он алты жыл бұрын өмірге мүлде бейім емес бойжеткенді "Жайсаң" жетімдер үйі кәмелеттік жасқа толдың деп шығарып салады. Содан бері Анастасияның жылы төсек, жұмсақ жастыққа басы жөнді тиген де емес. Тағдырлас досынан үш бала сүйген. Некелері заңды тіркелмегендіктен балаларының төлқұжаты да дұрыс емес. Мәртөк ауданында "шықпа жанымның" күйін кешкен келіншек сауыншы болып жұмыс жасаған. Ауданда баспанаға қол жеткізе алмай, жақында қалаға көшіп келеді. Келе сала қалалық әкімдікке бас сұққан әйелді ондағылар кезекке қойдық деген уәдемен шығарып салады. Анастасия Нелюбованың 7, 9 және 12 жастағы үш баласы бар. Мәртөктегі мектепте білім алған оқушылар қалада тіркеуде болмағандықтан бір айдан бері сабаққа бармай отыр. Оларды іздеп жатқан мектеп жоқ. Өзі де, балалары да киім-кешекке, ас-суға зәру. Отбасы Оңтүстік- Батыс-1 ауданы маңындағы жер үйлердің бірінде құрбысының үйін паналап отыр. Үш балалы келіншектің жағдайын айтып құзырлы мекемелерге хабарласқан болатынбыз. Қалалық жұмыспен қамту және әлеуметтік бағдарламалар бөлімінен Анастасия Нелюбованың Мәртөк ауданында тіркеулі екенін хабарлады. Сәйкесінше отбасына сол ауданда қажетті көмектер жасалуы тиіс. Үш балалы жетім келіншек ең әуелі баспанаға қол жеткізгісі келеді. Себебі үлкен екі қызы бойжетіп келеді. Жасөспірім қыздары болғандықтан кез келген жерге түней беру де қауіпті екендігі ананы ойландырмай қоймайды. Жетімдіктің зардабын тартып өскен Анастасия Нелюбова балаларымның тағдыры жолға қойылса екен, деп армандайды. Келіншекке көмек қолын созғысы келетін жомарт жандар онымен байланыс нөмірін редакциямыздан алуына болады.