Биыл 2006-шы жылы кезекке тұрғандарға тиесілі 10 сотық жерлері беріле бастады. 10 жыл күткен ақтөбеліктердің кейбірі енді жерлерін алуға келгенде асығар емес. Ал жер қатынастары бөлімі оларды бұрынғы мекен-жай, байланыс нөмірлері, тіпті төлқұжаттарымен іздеп таппай жатыр.
2003-2005-ші жылдары кезекке тұрғандарға жер 2015-2016-шы жылдары үлестірілген. Сол уақытта да 2003-ші жылдың кезегінен 120 адам табылмады. Әлі іздестіріліп жатыр. Ол адамдар кезектен шығарылмайды. Тек кейінге шегеріле береді дейді қалалық жер қатынастары бөлімінің басшысы Ұшқын Мыңбаев. Табылған бойда жерлері беріледі. Бірақ, адамның өзге жері болмауы тиіс. Басқа жаққа көшіп кетсе де жер берілмейді. Сондай-ақ, өмірден озған адамдар кезектен автоматты түрде шығарылады. Биыл осылайша 4,5 мың адам кезектен шығарылған. "Нұрлы жер" бағдарламасы бойынша 194 жеке тұрғын үй салынған. Әр 10 сотық жерде 145-152 шаршы метрлік тұрғын үйлер пайда болды. Әр шаршы метрі 120 мың теңгеден.