Ел бойынша далада жұмыс істейтін нысандардың уақытын шектеу жеңілдетіледі. Тізімге далада қызмет ететін тамақтану нысандары, жазғы алаңдар, спорттық іс-шаралар өткізу, стрит-фуд, балаларды сауықтыру ұйымдарының қызметі ілікті. Ақтөбелік рестораторлар осыған сай облыстың бас мемлекеттік санитар-эпидемиологі Нұрсұлу Беркімбаеваның қаулысын күтіп отыр. Қаламызда 100-ден астам жазғы алаң бар. Кәсіп иелері жұмысты бастап кетуге әзір отыр. ҚР Денсаулық сақтау министрі Алексей Цойдың сөзінше, "қызыл" аймақтағы тамақтануға арналған жазғы алаңдар таңғы тоғыздан кешкі сегізге дейін жұмыс жасай алады. "Сары" аймақтағылар таңғы жетіден түн ортасына дейін қызмет көрсете алады. Ал "жасыл" аймақта таңғы жетіден түнгі екіге дейін жұмыс істеуге рұқсат етілді. Бұл ретте мұндай барлық нысанда адам саны 50 пайыздан аспауы тиіс. Көше тағамдары мен ашық аттракциондардың қызметіне шектеу жоқ. Еске салайық, "қызыл" аймақтағы Ashyq бағдарламасына қосылған мекемелер "сары" аймақтың нормалары бойынша жұмыс істейді, ал "сарыдағы" мекемелер қосымшаның көмегімен "жасыл" аймақтың нормалары бойынша жұмыс істей алады.