Жауапсыз жүргізушілер жазаланады. Өңірде "Автобус" жедел алдын алу шарасы өтіп жатыр. Акция аясында жол инспекторлары қоғамдық көлік жүргізушілерінің жол қозғалысы ережелерін сақтау тәртібін қадағалайды. Өткен екі күнде жолдарда жүзден аса заң бұзушылықтар тіркелген. Жолаушыны аялдамадан тыс жерге түсірген 30 жүргізушіге айыппұл парағы толтырылған. Сондай-ақ, акция барысында автобус жүргізушілерімен бірге облыстық әкімшілік полициясы басқармасының қызметкерлері сұрақ-жауап әдісіне бағытталған дөңгелек үстел өткізді. Құқыққорғау органдарының өкілдеріне автобус жүргізушілері көкейлерінде жүрген сауалдарын қоюға мүмкіндік алды.Кездесуде жол сақшылары автобус жүргізушілері тарапынан болатын негізгі заңбұзушылықтарға тоқталды. Олар - жолдың қарама-қарсы бағытына шығу, жылдамдықты шамадан тыс асыру, көлік айдап келе жатып ұялы телефонмен сөйлесу. Ереже бұзған жүргізушілерге 5 АЕК көлемінде айыппұл салынған. Жыл басынан бері 143 жүргізуші әкімшілік жауапкершілікке тартылып, айыппұл төлеп құтылған. 44 автобус жүргізушісіне ескерту жасалған. Дегенмен соңғы екі жылдан бері бірде-бір қоғамдық көлік жүргізушісі куәлігінен айрылатындай өрескел заң бұзбаған.Дөңгелек үстел барысында жүргізушілер тұрғындар тарапынан да заңбұзушылық фактісіне итермелеу жағдайлары кездесетінін түсіндірді. Тіпті кейбір қоғамдық көлік жүргізушілері жеке көлік иелеріне қатысты шағымын жеткізді. Көлік саны көбейген уақыттарда жол бермеу фактілері өте көп дейді олар. Сол себепті шаһарда автобустарға арналған арнайы жолақтардың жоқтығы өткір мәселе болып отыр. Тағы бір шешілмей жүрген мәселе - қиылыстарда бағдаршамдардан бұрылған тұста қойылған жолаушылар жолағы. Бұл жолақтар өте тиімсіз сызылған. Мәңгілік ел, Әлия Молдағұлова, Пожарский мен Рысқұлов көшесі қиылысындағы жаяу жүргіншілер жолағы көп автобус жүргізушілерінің жол ережесін бұзуына септік етіп жүрген көрінеді. Бұрылыстарда жолаушыларды байқамай қалып, жол сақшыларының құрығына түсіп қалатын көрінеді. Ал үнемі уақыт есептеп келе жататын жүргізушілерге бұл тиімсіз.