Ауыл мен қала орталығын жалғайтын көлік керек. Жаңақоныс ауылы маңындағы "Жасыл көшеттер" бау-бақша ұжымы тұрғындарының сұранысы бұл. Тұрмысқа қажетті су, газ, жарықты өз күштерімен өткізген. Тек көлік байланысын орнатуға күштері жетпеген. 5 жылдан бері басты жолға 2,5-3 шақырым жаяу жүріп барады. Әсіресе, қиналатын қариялар мен балалар. Көктем мен күзде саз балшық кешетін тұрғындар, қыста қардың ортасында қалады. Жазда қиындық азайғанымен, бүгін алғашқы қар түскенде "Жасыл көшеттер" бау-бақша ұжымының тұрғындары тағы да дабыл қақты. Қоғамдық көлік бұл бау-бақша ұжымының ішіне кірмек түгілі, жақындамайды да. Тұрғындар үйлеріне Жаңа қоныс ауылына қатынайтын №21, 45 автобустармен Ақтөбе-Хромтау трассасы бойынан түсіп барады. Балаларының денсаулығы мен өміріне алаңдайтын ата-аналар жергілікті билік өкілдерінен қоғамдық көлік болмаса да, мектеп автобусын шығаруды сұрайды. "Жасыл көшеттер" бау-бақша ұжымында шамамен 250-ден астам бала бар. 80 бала Оңтүстік-Батыс ауданындағы №10 мектепке барады. Олардың өміріне білім мекемесінің басшылары да алаңдап отыр. Себебі, үлкен жолдан екі рет кесіп өтеді. Алайда, оқушыларды тасуға мектеп автобусы қарастырылмаған. Болашақта да бұл мәселе шешілмейтінге ұқсайды.