Жастар уақытының көп бөлігін спортқа арнауы тиіс. Бүгін Ақтөбе құрылыс және бизнес колледжінің студенттері ҚР халықаралық дәрежедегі спорт шеберлері Әшім Қали және Асқар Шүйітбаевпен кездесті. Кездесуде жастарды толғандырып жүрген көптеген мәселе қозғалды. Спортшылармен кездесуге колледждің 1-4 курс аралығындағы студенттері шақырылған. Мұнда білім алып жатқан 608 оқушының дені ер бала. Аудандардан келгендер көп. Бір бөлігі 9 сыныпты тәмамдаған соң түскен. Колледж директорының тәрбие ісі жөніндегі орынбасары Мәлік Қосмағанбетовтың айтуынша, ер балалардың тәртібі жіті бақылауда. Дегенмен былтыр кешкі мезгілде көше кезіп, тәртіп сақшыларына ұсталғандар бар. Тәртіп бұзғаны үшін жасөспірімнің ата-анасына айыппұл салынған. Ал, қаңтар айында компьютер клубының ішінен түн жарымда ұсталған бір студент замандастары алдында қатаң сөгіс естіген. Спортшылар күн тәртібінен түспей тұрған - жастар арасындағы қылмыс, бұзақылыққа тосқауыл болу үшін оларды көбірек спортпен айналысуға шақырды. Үйірмелерге жазылуға кеңес берді. Қазір қала бойынша ақылы спорт секциялары, дзюдо, таэквондо, қазақ күресі, бокс, жүзу, футболға жаттықтыратын үйірмелер көп. Бағалары айына 10 мыңнан жоғары. Бұл онсыз да жыл сайын оқу ақысы өсетін колледж, жоғары оқу орындарында оқитын студенттер үшін қолжетімсіз. Ата-ананың да қалтасы көтермейтіні хақ. Ал, тегін үйірмелер тек мектеп қабырғасында ғана жұмыс істеп тұр. Ол үйірмелер мектеп оқушыларына ғана арналған.