Жас кітапханашылар арасында байқау басталды
Өңірде жас кітапханашыларға арналған «Мен жаңа әлем жасампазымын» облыстық байқауы басталды. Жас мамандардың шығармашылығын қолдауға бағытталған байқау өңірдегі кітапхана саласына тың серпін береді дейді мамандар. Өңірде жас кітапханашыларды қолдауға бағытталған «Мен жаңа әлем жасампазымын» облыстық байқау жарияланды. Байқау С.Жиенбаев атындағы облыстық жасөспірімдер кітапханасының бастамасымен және облыстың мәдениет, архивтер және құжаттама басқармасының қолдауымен ұйымдастырылуда. Жас кітапханашылардың шығармашылық ойлауын дамыту, кітапхана саласына инновациялық жобалар мен заманауи тәжірибелерді енгізу көзделген. Қатысушылар цифрлық жобалар, интерактивті мәдени алаңдар, жастарға арналған кітап оқу клубтары, коворкинг-кеңістіктер және жаңа форматтағы кітапхана қызметтерін ұсыну арқылы өз жобаларын қорғауға мүмкіндік алады. Аталмыш байқау жас мамандардың кәсіби шеберлігін арттырумен қатар, XXI ғасыр талаптарына сай кітапханашының жаңа бейнесін қалыптастыруға бағытталған. Ұйымдастырушылардың айтуынша, бүгінгі кітапхана — тек кітап сақтайтын орын емес, ол жастардың шығармашылық орталығы мен мәдени диалог алаңына айналуы тиіс. Жоба аясында үздік деп танылған бастамалар тәжірибеге енгізіліп, облыстық деңгейде қолдауға ие болады. Бұл — өңірдегі мәдени кеңістікті кеңейтіп, жастардың мәдени белсенділігін арттыруға бағытталған маңызды қадам.Количество показов: 10
Дата создания: 28.11.2025 07:53:45
