Жануарлардың жанашырлары қоғамда қатыгездікті насихаттауды тоқтатуды сұрайды. Ақтөбелік белсенділер бүгін осы өтініштерімен қалабасы Асхат Шахаровпен кездесуге барды. Итке таланып өлген баланың оқиғасынан кейін ақтөбеліктер екіге жарылды. Бірі бұралқы ит-мысықтардың көзін құрту керек десе, келесі тарап жауыздыққа жол бермеу керек деп отыр. 12 жастағы итке таланып өлген баланың оқиғасынан кейін қалада бұралқы ит-мысықтарға өшігушілер көбейген. Бұл бүгін қала әкімдігіне келген қоғам белсенділерінің бірі Венера Кондрашенконың пайымы. Ол иесіз бос жүрген иттерді жаппай улап жатыр деген ақпараттың барын айтты. Асхат Шахаровпен кездесуге келген адамдар алдына облыстық ветеринарлық басқарма басшысы Құсайын Сәрсембай шықты. Блогерлер бұралқы ит-мысықтарды асырап бағатын арнайы орынның ашылғанын қалайды. Ал өңірдің бюджетінде ондай мүмкіндік жоқ. Жалпы қалада иесіз ит-мысыққа санақ жүргізілмеген. Облыстың бас ветеринары шамамен 10 мыңдай қаңғыбас ит болуы мүмкін дейді. Ал, оларды бағып, тамақтандыру үшін айына бюджет есебінен 200 млн теңге бөлінуі тиіс екен. Үй жануарын тәулігіне бір рет тамақтандырғанның өзіне 400 теңге кетеді . Ал, қазіргідей олардың көзін жоюға кететін шығын мұнан бірнеше есе аз. Қаңғыбас иттердің көзін жоюға биыл бір жылдық жұмыстар үшін 51 млн теңге бөлініп отыр.