Суға шомылу маусымы жақындап қалды. Су қоймалары тексеріліп жатыр. Ақтөбе су қоймасы. Сырт көзге суы таза көрінеді. Жағасындағы құм сусылдап тұр. Әр жерде пластик, шөлмек бөтелкелер жатыр. Басқа қоқыс ағаштың түбіне үйілген. Сүңгуірлер бұл судың табанын әлі сүзбеген. Ертең барады. Ал, Елек өзені бойындағы Жағажай-1 және "Гринлэнд" демалыс орнының су айдынын қарап шыққан. Су түбі таза, ескерту жоқ, дейді кезекші-диспетчер қызметінің жетекшісі Оксана Кичигина. Ертеңнен бастап басқа жағажайлардағы су тексеріледі. Қазір ерікті құтқарушыларды оқыту жүргізіліп жатыр. Курсқа 66 адам жазылған. Олар ертең Ақтөбе су қоймасында суға батқан адамды құтқаруға машықтанады. Жыл басынан бері облыста бір адам суға кетті. Мамырдың 12-де Ойыл ауданында тұрғындар су түбінен 50 жастағы ер адамның мүрдесін шығарып алған. Ол рұқсат етілмеген аумақта шомылған.