Қалалық мәслихат депутаттарынан құралған комиссия мүшелері сенбіде қала жолдарын тексерді. Мәскеу және Құрмыш аудандарындағы бірнеше көшені аралады. Алғашқы нысан - Мәскеу ауданындағы Красин көшесі. 2017 жылы күрделі жөндеуден өткен көшенің ұзындығы 541 метр. Бөгенбай батыр мен Озерный көшелерін жалғайды. Бөгенбай батыр көшесінен басталатын жолдың ені талапқа сай емес. Жол жиегінде жаяу жүргіншілер жолы салынбаған. Жан-жағы абаттандырылмаған. Депутаттардың көңілінен шықпады. Көше қиылысы болғандықтан "Феб групп" ЖШС жөндеген жолдың ені 4,5 метр ғана. Екі көлік қатар келсе мына жолдан өте алмайды. Жолға жауапты мамандардың сөзінше, 100 метрге дейін осындай. Әрі қарай стандарт бойынша 7 метр. Мәскеу ауданындағы Зоя Космедемьянская көшесі де былтыр күрделі жөнделген. "Базис и К" компаниясы жөндеген жолдың құны - 50 млн. теңгеге жуық. Ұзындығы 470 метрге жақын жолдың қос қапталына жаяу жүргіншілер жолы салынған. Лэд жарықтар орнатылған. Дегенмен, комиссия мүшелері бұл жерден де кемшілік тапты. Кейін комиссия мүшелері жөндеу басталып, аяқталмаған көшелерді аралады. Мамандардың сөзінше, Құрмыш ауданындағы Байғанин көшесінің биыл 70 пайызы дайын тұр. Жоба құны 103 млн. теңге. Жоспарланған қаржының 50 пайызы ғана биыл бөлініп, толық игерілген. Енді Байғанин көшесінің екінші бөлігі келесі жылы күрделі жөнделеді. Яғни, ауыспалы нысан. Биыл мердігер мекеме өз қаржысына мұнда жаяу жүргіншілер жолын салып, жолға қиыршық тас төсейді. Байғанин көшесінің күрделі жөндеуден өткен бөлігін мамандарәлі қабылдамаған. Келесі жылы толық аяқталғаннан кейін ғана техникалық бақылаудан өтеді.