Жаңақоныс ауылында 4 жыл бұрын салынып, қолданысқа берілген көп қабатты үй әлі де орталықтандырылған кәріз жүйесіне қосылмаған. "Центр Групп" компаниясы тұрғызған үш қабатты тұрғын үйдің маңында беті ашық кәріз құдығы бар. Тұрғындар оған балалар түсіп кете ме деп қауіптенеді. Ал, өткен сенбіде құдықты тазартуға келген қызметкер құдыққа түсіп кете жаздаған. 29 жастағы ер адамды диаметрі 400 мм құбырдан құтқарушылар әрең алып шыққан. Әлеуметтік желіде пайда болға мына видеода құтқарушылардың ер адамды шұңқырдан алып шығып жатқанын көруге болады. Облыстық төтенше жағдайлар департаменті баспасөз қызметінің мәліметінше, Жаңақоныс ауылында ер адамның шұңқырға түсіп кеткендігі жөнінде хабарлама 4 маусым сағат кешкі алтылар шамасында келіп түскен. Құтқарушылар бірден оқиға орнына жетіп, диаметрі 400 мм құбырға 29 жастағы ер адамның түсіп, қайта шыға алмай қалғандығын анықтаған. Құтқару операциясына 8 адам жұмылдырылып, әрең дегенде ер адамды алып шыққан. Бұл шұңқыр - Жаңақоныс ауылы Ынтымақ көшесі №16-үйдің кәріз құдығы. Зардап шеккен ер адам кәріз құдығын тазартуға келген. Тұрғындардың айтуынша, үш қабатты тұрғын үйді тұрғызған "Center Group" компаниясы бұл үйдің кәріз жүйесін орталықтандырып беруге әлде қашан уәде еткен. Алайда, уәде уәде күйінде қалғалы міне 3 жылдан асқан."Center Group" компаниясының өкілдері кәріз жүйесін орталықтандыру қалалық құрылыс бөлімінің міндеті екенін айтып ақталды. Мемлекеттік мекемеге сеніп, жүріп қалдық деген компания өкілдері биыл жыл соңына дейін кәріз жүйесін орталықтандырып береміз деп отыр. Ол үшін мердігер мекемеде бекітіліп, қаражат бөлініп қойған. Жаңақоныс ауылы Ынтымақ көшесінде үш көп қабатты тұрғын үй құрылысы жоспарланған. Әзірге тек біреуі ғана толық салынып, қолданысқа берілген. Тағы екі тұрғын үйдің құрылысы уақытша тоқтап тұр. Құрылыс компаниясы жаңадан салынатын үйлердің де кәріз жүйесі бірден орталыққа жалғанатынын айтты.