Жаңақоныс-3 ауылына жарық, су, газ әлі өтпеген. Осыны талап етіп бүгін жүзге тарта адам жиналды. Осыдан екі жыл бұрын бой көтере бастаған ауылда қазір 120 үй салынған. Соның бесеуінде ғана адам тұрып жатыр. Қалғандары өмір сүруге жағдай жасалмаған ауылға көшіп келе алмай отыр.Қаладан 15 шақырым қашықта орналасқан Жаңақоныс ауылының іргесі күн санап кеңеюде. Қатар-қатар салынып жатқан жер үйлердің көптігінен "Жаңақоныс-3", "Жаңақоныс-4" "Жаңақоныс-5" деп аталған ауылдар пайда болған. Әзірге "Жаңақоныс-2" ауылына ғана коммуналдық желілер толық тартылған. Одан әрірек орналасқан ауылдарға жарық, су, газ әлі кіргізілмеген. Ол жерлерде шамамен 120-дай үй тікейтілген. Даңғарадай үй салып қойып, адамдары пәтер жағалап жүр. Өйткені жарық, су, жылусыз ол үйлерде тірлік кешу мүмкін емес. Жиналғандар жергілікті биліктен мәселені шешуді талап етіп жатыр. Тұрғындардың көпшілігіне жер 2018- жылы берілген. Құжат бойынша инфрақұрылым бүгінге дейін салынып бітуі тиіс болған. Бірақ уәде орындалмаған. Тұрғындардың талабы бойынша ауылға келген Астана ауданы әкімшілігі өкілі жоспар бойынша инфрақұрылым алдағы жылы тартылатынын жеткізді. Халықтың өтінішін бүгін тағы бір мәрте тыңдаған әкімдік өкілі республикадан берілетін қаражаттың кешеуілдеп жатқанын жеткізді. Қаржы берілмей, инфрақұрылым тартылмайды. Яғни, ауылға қоныстанып үлгерген халықтың жарық, су, жылусыз әлі қашанға дейін отыратыны белгісіз.