Жаңа оқу жылында «Келешек мектептері» ұлттық жобасы аясында төрт мектеп пайдалануға берілмек
Биыл облыстағы мектептерде шамамен 190 мың оқушы білім алады. Оның 19 мыңнан астамы алғаш мектеп табалдырығын аттайды. Ал, жаңа оқу жылында «Келешек мектептері» ұлттық жобасы аясында төрт мектеп пайдалануға берілуі мүмкін. Қатарында Сарыжар ауылы мен «Саяжай-1» тұрғын алабында 300 орындық, «Бауырластар-3» тұрғын алабында 600 орындық және «Алтын Орда» ықшам ауданында 2000 орындық мектеп бар. Облыстық білім басқармасының басшысы Бұлбұл Күзембаеваның сөзінше, 12 білім беру мекемесінде күрделі жөндеу жүргізілуде. Қазір Қобда ауданының Қызылжар мектебі мен Алға ауданының Қарабұлақ мектебі оқушыларды қабылдауға дайын. Қалған 9 мектептегі жөндеу жұмыстары тамыз айының соңына дейін аяқталады. Облыстық білім басқармасының мәліметінше, тағы 388 мектептегі ағымдағы жөндеу жұмыстары 20 тамызға дейін аяқталады. Жаңғырту және реновация бағдарламалары аясында 111 мектепте жөндеу, пән кабинеттері, кітапханалар және асханалар үшін жиһаз бен жабдықтар сатып алу жұмыстарына 1,7 млрд теңге бөлінген. Аймақтағы 80 мектепте 3 740 бала оқиды. Бірақ оқушы саны белгіленген нормативке жетпейді. Бастауыш мектепте кемінде 5, негізгі мектепте – 41, орта мектепте – 81 оқушы болуы қажет. Қазір ауылдарға көпбалалы отбасыларды тартып, оларға үй беріп, балаларды мектепке дайындау және оларды шаруа қожалықтары арқылы жұмыспен қамту жүріп жатыр. Бүгін де Алға, Қобда және Мұғалжар аудандарындағы 13 мектепке 17 отбасы қоныстанып, 50 баламен нормативке жетті.Количество показов: 47
Дата создания: 13.08.2025 09:25:40
