Елімізде тұрғын үй бағасы шарықтап барады. Статистика комитетінің дерегінше, жаңа баспананың құны 1,9 % -ға өскен. Тиісінше үйдің 1 шаршы метрінің бағасы 352 654 теңгені құрап отыр. Баға тұрақсыздығы біздің облысты да айналып өтпеді. Тұрғын үйді сатып алудан бөлек жалға алу құны да бой бермей барады. Баспана мәселесі қашан да басты назарда. Дегенмен үйлі болсам деген азаматтардың тұрғын үйге қол жеткізуі жыл сайын қиындап барады. Себебі жайлы тұрғын үйдің 1 шаршы метрін қайта сату құны өткен айда 1,2 %-ға артқан, тиісінше бағасы 279 216 теңгені құрады. Мамандар жағдайға байланысты бірнеше себепті алға тартады. Пандемия кезінде көрші елдермен алыс-беріс тоқтап, құрылыс материалдарының тапшылығы сезілген. Тиісінше бағасы да өскен. Сондай-ақ, зейнетақы қорынан берілген қаржы да баспана бағасының шарықтауына себепші болды. Бұдан бөлек, 2021- жылдың қазан айында жалға берілетін тұрғын үй құны өткен жылдың сәйкес кезеңімен салыстырғанда 18,5 %-ға өсіп, рекордық көрсеткішті көрсеткен. Ал жыл басынан бері пәтерді жалдау бағасы 1 шаршы метріне 1888 теңгеге жетті.