Ерболат Сүйіншалин мұнай, құрылыс компанияларында еңбек еткен. Қазіргі қызметіндегі табысы мардымсыз. Бар болғаны 30 мың теңге жалақы алады. Ендігі ойы жұмыс орнын ауыстыру. Электрик маман бүгін осы мақсатпен жәрмеңкеде жұмыс іздеді. "Нұр Отан" партиясының облыстық филиал ғимараты адамға лық толы. Бәрі де екі қолға бір күрек іздеп жүр. Көбі мұнай компанияларынан қысқартылып, қазір жұмыссыздардың қатарына қосылған ер азаматтар. Араларында оқу орнын тәмамдап, мамандығы бойынша жұмыс таппай жүрген жастар да бар.
Келушілер үшін арнайы ақпараттық тақта ілініп, қалалық жұмыспен қамту орталығының мамандары мемлекеттік бағдарламаларды түсіндірді. Бүгін барлығы 42 мекеме 485 бос жұмыс орнын ұсынды. Жұмыс берушілердің көбі тігінші, еден жуушы, қамыр илеп, нан пісірушілерді іздеді. Әсіресе, медицина, білім, қызмет көрсету мекемелері өздеріне нәзік жандыларды жұмысқа алуға келісіп отыр. Ал ер азаматтарға жол жөндеу, аббаттандыру және көгалдандыру, құрылыс жұмыстары ұсынылды. Айта кетейік, «Жұмыспен қамту- 2020" жол картасы бағдарламасы аясында 15 адам жұмыс берушінің сұранысына сәйкес «Көгалдандыру» кәсібі бойынша маусым айында қайта даярлау курстарын аяқтап, тұрақты жұмыспен қамтылады.