Ұлы Отан соғысының ардагерлері мен көзі нашар көретін 1, 2-ші топтағы мүгедектер қоғамдық көлікте бұрынғысынша тегін жүре алады. Ал бұған дейін қалалық жұмыспен қамту және әлеуметтік бағдарламалар бөлімі тарапынан әлеуметтік көмек алып келген 17 мыңнан астам қала тұрғыны жәрдемақыға 10 мың теңге қосып алатын болды. Бүгін қалалық мәслихаттың кезектен тыс сессиясында зейнеткерлер тегін жүрсін деген 2009 жылғы шешімнің күші жойылды. Әлеуметтік көмекке биылға 870 миллион теңге бөлінді. Бұл қаржы әлеуметтік мұқтаж жандардың қатарына кіретін 23 мың азаматқа тиесілі. Сонымен қатар, мүгедектерге арналған инватакси қызметіне бюджеттен 12,6 миллион теңге бөлінді. Көзі нашар көретіндер де таксимен жүре алады. Оларды арнайы көлікпен тасылмалдауға 5,6 миллион теңге қарастырылды. "Жұмыспен қамтудың жол картасы-2020" бағдарламасы аясында 341 миллион теңгеден астам қаржы қарастырылған. Жазғы демалыста еңбек ететін оқушылар мен студенттер үшін 150 миллион теңге бөлінді. Ақтөбе қаласындағы құрылыс жұмыстарына Ұлттық қор мен республикалық бюджеттен 7 миллиард теңге бөлінді. Осылайша қала бюджеті 54 миллиард теңгеге жетті. Қаржының бір "Нұр Ақтөбе" ықшам ауданына инженерлік желілерді жүргізуге, Батыс, Батыс-1 ықшам аудандарының кәріз, су ағар жүйесін жүргізуге бағытталып отыр. Жұмысшы жастарға арналған баспана мәселесі шешілетін болды. Құрылыс жұмыстарына 565,1 миллион теңге бөлінді. Шағын отбасылық екі жатақхананың әрқайсысы 5 қабатты болып салынады. 2 жатақханада 104 пәтер болады.