Бірыңғай жинақтаушы зейнетақы қорында зейнетақы шотын ашу жеңілдетілді. Егер азаматтың міндетті зейнетақы жарнасын салатын жеке шоты болмаса, жұмыс берушіден алғашқы жарна келіп түскен кезде оның зейнетақы шоты автоматты түрде ашылады. Қордың ақпараттық жүйесінде жеке тұлғаның аты-жөні, жеке сәйкестендіру нөмірі, туған күні жіті тексеріледі. Ал, бұл мәліметтерді жинақтаушы қор мемлекеттік органдардың ақпараттық жүйелерінен алады. Бұған дейін азаматтар зейнетақы шотын ашу үшін өтініш рәсімдеуге міндетті болған еді. Бірақ, бұл өзгеріс барлығына бірдей қатысты емес. Сонымен қатар, салымшы зейнетақы шоты бойынша үзіндіні смс хабарлама арқылы ала алады. Ол бір реттік смс-пароль арқылы жүзеге асады. Салымшы электрондық үкімет порталына тіркеліп, көшірме алуға сауал жолдауы тиіс. Бірер минуттан кейін жолдама берушінің ұялы телефонына бір реттік смс-пароль жіберіледі. "Осы тәсілмен зейнетақы шотынан көшірме алу өте ыңғайлы, себебі 24 сағат үздіксіз жұмыс жасайды",- дейді мамандар. Азаматтар өз гаджеттері арқылы зейнетақы жарнасының шотқа түсуі мен қозғалысы туралы, шетелге шығуға мүмкіндігі, әкімшілік құқық бұзушылық жасағаны туралы мәліметтер секілді 24 түрлі қызмет ала алады. Ол үшін олар "Мобильдік азаматтар базасында" тіркелуі қажет.