Ақтөбеде өзендердің арнасын кеңейту жұмысы уақытша тоқтатылды. Жексенбі күні өңірімізге арнайы жұмыс сапарымен келген экология, геология және табиғи ресурстар министрі Мағзұм Мырзағалиев осындай пәрмен берді. Министр Ақтөбе су қоймасы мен Қарғалы, Елек өзендерінің жағдайымен танысты. Жергілікті белсенділер, жобалаушылармен, мамандармен бетпе-бет кездесіп, экологтармен, тұрғындармен сөйлесті. Халықтың пікірін тыңдаған министр "нақты шешімге келу қиын, қылмыстық іс қозғауға әлі ерте" - деді. Оған қоса Алға химиялық зауытының проблемасы, жағымсыз иіс, Көкжиде су көзінің мәселелерімен де таныс екенін жеткізді. Мемлекет басшысы Қасым-Жомарт Тоқаев өткен аптада министр Мағзұм Мырзағалиевке Ақтөбедегі экологиялық мәселені шұғыл түрде шешуді тапсырған еді. Тапсырма бойынша келген шенеунікпен тұрғындар, өңірдің белсенді қоғам мүшелері өзендер маңында күтіп тұрып мәселелерін айтып тілдесті. Аянышты халде тұрған өзендердің жай-күйін түсіндірді. Министр Мырзағалиев "өзендердің табанын тазартып, арнасын кеңейтуді" өте маңызды жоба деп атап, "мәселе жобада емес, оның қалай жүзеге асырылып жатқанында" деді. Ол алдағы уақытта арнайы жұмыс тобы құрылып, оған жергілікті экобелсенділер, қала жағдайын білетін сарапшылар, мемлекеттік орган өкілдері кіретінін айтты. Жұмыс тобы облыс әкімімен бірге жұмыс істейді. Ал мәселелердің жауабы табылғанша өзен арнасын кеңейту жобасын уақытша тоқтату туралы шешім қабылдады. Қалалық әкімдік 2017 жылғы су тасқынынан соң сегіз өзеннің арнасын кеңейтіп, табанын қоқыстан тазалау туралы шешім қабылдаған болатын. Бұл жұмыстарға "Жол картасы" бойынша 7 миллиард теңге бөлінген. Биыл осы қаржының екі миллиард теңгесі жұмсалған. Қалған қаржы алдағы екі жылда кезең-кезеңмен атқарылатын жұмыстарға бөлінуі тиіс. Ал, жергілікті экологтар өзен арналарын тазарту кезінде бұлақтардың көзі бітеліп, жағалаудағы ағаштардың аяусыз оталғанын айтып дабыл қақты. Игерілмеген қаржы табиғатты қайта қалпына келтіруге жұмсалсын, экожүйеге залал келтіргендер жауапқа тартылсын деп отыр.