Жеңістен кейінгі ұрпақтар жауынгер аталарын ұмытқан емес. Бүгін Әлия Молдағұлованың монументі алдында ақтөбелік іздестіру жасақтарының 30 жылдығына арналған митинг өтті. Шараға Ресей Федерациясының Тверь, Мәскеу, Калуга, Ярослав, Псков, Орынбор, Челябі, Новгород облыстарынан қонақтар және қазақстандық іздеу жасақтарының жетекшілері мен мүшелері қатысты. Келген қонақтар мерген қыздың монументіне гүл қойды. Мәскеу қаласындағы "Ақтөбелік жерлестер" қоғамы төрағасының орынбасары Асылбек Төлешов мерейтойға құр қол келмепті. Ол жазушы Дарья Тимошенконың былтыр ғана басылып шыққан "Әлия Молдағұлованың соңғы ұрысы" кітабын ала келіпті. Профессор іздестіру жасақтарының жұмысына арналған ғылыми конференцияға қатысып, аталмыш кітапты қазақ тіліне аудару туралы өтінішін айтты. Оқулық оқырманға көптеп тараса іздестіру жұмыстарын жеңілдеткен болар еді дейді. Іздестіру жұмыстарының жұмысына облыстық әкімдік қаржылай да, ұйымдастыру тұрғысынан да жүйелі түрде қолдау көрсетеді. Биыл әсіресе Новгород қаласына іздеушілер екі рет барып қайтқан. Қазба жұмыстарымен екі топ- "Әлия" іздеу жасағы мен "Борыш" әскери-спорттық клубы айналысады. 30 жылда іс-түссіз жоғалды деп танылған 3 мыңға жуық жауынгердің сүйегі табылған. Конференция кезінде сондай-ақ, "Іздестіру жалғасады" деректі фильмі көрсетілді. Фильм жастарды отансүйгіштікке, тарихты қастерлеуге үндейді. Жыл сайын Ресей жеріне барып, Ұлы Отан соғысы кезінде қаза тапқан жауынгерлердің сүйектерін іздеу және қайта жерлеу жұмыстары туралы баяндайды. Іздестіру жасақтарының мүшелері ертең Қобда ауданы Әлия ауылындағы мұражай жұмысымен танысады.