Өзбек азаматтары көмек сұрайды. Алаяқтардың кесірінен құжаттарынан айрылып қалған Өзбекстан азаматтары Мұрат Мырзабаев пен Гүлбахор Маманова 27-ші ақпаннан бері мейірімді адамдардың үйін паналап жүр. Ресейге өтпекші болған қос шетелдікті бастап келе жатқан таныстары орта жолда тастап кеткен. Гүлбахор Маманова Өзбекстан Республикасының Жизак облысы Гәллаарал ауданында тұрады. 27 жастағы азаматша шетел тілін меңгермеген. Ресейге жұмыс істеуге бет алған ол орыс тілін де жарытып түсінбейді. Айтуынша, ауылында әкесі мен екі бауыры бар. Тұрмыс құрмаған. Өзге мемлекетке жұмыс істеуге алғаш рет бара жатыр. Елінде Азат есімді адаммен танысып, Мәскеу қаласында жылыжай өсіретін кешенге қарапайым жұмысшы ретінде тұрғызатын болып келіседі. Ақпан айының соңында Шымкент қаласына жетіп алған Гүлбахор Лола есімді азаматшамен танысады. Ол жаңа жұмысы туралы сұрап біледі. Азат пен Лолаға сенген ол жарты жолда таныстарынан көз жазып қалған. Әрі қарай Мәскеуге өз бетімен баруға жүрексінген оның құжаттарын автобус жүргізушісі Мәлік тартып алып кетіпті. Автобуста бірге келген Мұрат Мырзабаевтың да жағдайы дәл осыған ұқсас. 32 жастағы Мұраттың отбасы Өзбекстанның Наманған облысында қалған. Мәскеуге жұмыс іздеп шыққан оның да қалтасында көк тиыны жоқ. Тіпті автобусқа төлейтін 30 мың теңгені Ресейде жұмыс жасап нәпақа тапқан соң ғана төлеймін деп келіскен. Мұрат Мырзабаевтың да төлқұжаты "637" мемлекеттік нөмірлі автобустың жүргізушісі Мәліктің қалтасында кеткен. Қос шетелдік Мәлік есімді Қазақстан азаматы біздің Ресейге бармайтынымызды білгесін қорқытты, осы жақта қара жұмысқа саламыз деп күш көрсетті деп отыр. Жар жолда автобустан түсіп қалып, қақаған қыста бүрсеңдеп жүрген оларды Мәртөк ауданының тұрғындары көріп, көмек көрсеткен. Естерін жинаған олар Мәртөк аудандық ішкі істер бөліміне арыз түсіреді. Гүлбахор Маманова аудандық ішкі істер бөлімі қызметкері Эльдар Ракишовтың бұл іс бойынша азаматтық іс қозғағанына наразы. Менің арызымды ықылассыз жүре-бара тыңдады деп отыр. Дегенмен қос шетелдіктің уәжі бойынша облыстық полиция департаменті баспасөз қызметі хабарлама жолдады. Ақпарат мәтініне сай, Мәлік есімді Оңтүстік Қазақстан облысының тұрғынына тиесілі автобус Ақтөбе облысы аумағынан кері өткен жоқ. Өткен жағдайда дереу тоқтатылып жауап алынады. Ал, ол уақытқа дейін Өзбекстан азаматтарының мәселесі қалай шешілері белгісіз.