Ақтөбеліктерге міндетті медициналық әлеуметтік сақтандыру жүйесін түсіндіру жұмыстары жалғасып жатыр. Бүгін "Нұр Отан" партиясы облыстық филиалы жанынан құрылған ақпараттық топ Ақтөбе рельс-арқалық зауытының ұжымымен кездесті. Ақпараттық топ соңғы екі айдың ішінде қаладағы 15 кәсіпорын ұжымымен кездескен. Келер жылдан бастап дәрігерге көріну үшін жұмыс беруші міндетті әлеуметтік медициналық сақтандыру жүйесіне ай сайын жарна аударып тұруы тиіс. Ақша аудару жұмыстары шілде айында басталды. Қазір қорда 80 миллион теңге бар,-дейді мамандар. Жаңа жүйеге қарамастан, мемлекет есебінен 14 топ тегін медициналық көмек алатын болады. Олар- 18 жасқа дейінгі балалар, студенттер, көп балалы аналар, күміс, алтын алқа иегерлері, жас босанған аналар, жүкті әйелдер, зейнеткерлер мен мүгедектер. Сондай-ақ, дәрігерге тегін қаралу мүмкіндігі сотталғандар мен ресми түрде жұмыссыз ретінде тіркелгендерге де қарастырылған. Бұл топқа кірмейтін азаматтар үшін жұмыс орны осы жылдың 1-шілдеден бастап жалақы есебінен 1 пайыз жарна төлеуі тиіс. Статистикаға сүйенсек, ел бойынша бұл топқа 6 миллионнан астам адам кіреді.