Заречный-1 ауылындағы Телефонная көшесіне көлік атаулы жоламай тұр. Себебі көшеде не асфальт не электр жарығы жоқ. Тұрғындары үйімізге жедел жәрдем, такси шақырта алмай жүрміз, дейді. Бұл Заречный-1 ауылындағы Телефонная көшесі. Қарлыға Көпесова бұл көшеде сонау 1975 жылдан бері тұрады. Әйелдің сөзінше, жол жоқ, деп таксилер де бұл маңға жолағысы жоқ. Көктемде жедел жәрдем көліктері балшыққа батып, шақыртуға жете алмай жатады. Сабақ басталғалы ата-аналар балаларын аялдамадан күтіп алып, қараңғыда аяқ жолдарын қол шаммен жарықтандырып, үйлеріне әрең жететін көрінеді. Халық көшеге асфальт төсеу, жарықтандыру мәселелерін айтып, қалалық әкімдікке үш жылдан бері шағымданып жүр. Қағаз жүзінде тиісті мекемелерге арыздарын 15-ші қыркүйек күні тағы жолдаған. Тұрғындардың сөзінше, Телефонная көшесін жөндейтін болып, жұмысшылар жолдың өлшемін бірнеше қайтара алған. Бойында 25-ақ үй орналасқан 450 метрлік шағын көшені жөндеуге 95 миллион теңге жаратылатыны жөнінде сыбыс та жүрген. Бірақ биыл көше бойында ешқандай іс-әрекет байқалмайды. Тұрғындардың мәселелері бойынша қалалық тұрғын-үй коммуналдық шаруашылық, жолаушылар көлігі және автомобиль жолдары бөліміне хабарластық. Бөлімнің сектор меңгерушісі Науаи Әмірбеков бұл мәселе бойынша мамандар тексеру жүргізетінін жеткізді. Биыл аталған көшені жөндеуге байланысты тендер шарттарына сәйкес екі рет байқау өткізілген. Екеуінде де ешқандай мердігер байқауға қатыспаған. Осыған байланысты жобаға түзету енгізіліп, 2023 жылы байқау қайта өткізілмек. Қаланың ішінде отырып, неше жылдан бері түзу жолға жарымаған халық елді мекеннің өркенитеттен тыс қалмағанын қалайды. Мұнда көшелерге атау, үйлерге нөмір берілмеген. Бұл датұрғындарына көп қиындық туғызып тұр.