Үйлерінде отырып, шағын кәсіппен айналысатындарды жан-жақты қолдау керек. Бүгін Ақтөбеде өзін-өзі жұмыспен қамтығандардың форумы өтті. Оған 200-ге жуық адам қатысты. Өзін-өзі жұмыспен қамтушылардың ішінде бала күтімімен үйде отырған аналар, еш жерде ресми жұмыс істемейтін тұрғындар бар. Дені-нәзік жандылар. Олар үйде қарап отырғанша шаруамен айналысуды жөн санап, кәсіппен шұғылданып отыр. Біреуі кондитер өнімдерін пісіріп сатса, енді бірі-тігінмен айналысады. Мол табысқа кенеліп жатпаса да, өздерін жұмыспен қамтып отыр. Жиын барысында өзін-өзі жұмыспен қамтығандар үшін шағын несиелер беру, өз кәсібін дөңгелету бойынша шеберлік сабақтарын өткізу, құқықтық кеңестер беру жайлы айтылды. Сондай-ақ, өзін-өзі жұмыспен қамтып отырған азаматтар міндетті түрде бірыңғай зейнетақы жинақтау қорымен келісімге отыруы тиіс. Медициналық көмек алу үшін ай сайын жарна төлеу мәселелері талқыланды. Сатитистикаға сүйенсек, елімізде 2,8 млн. адам өзін-өзі жұмыспен қамтыған. Бұл санатқа - құрылысшылар, қара жұмыспен айналысатындар, базардағы жүкшілер мен дүкен сатушылары да кіреді. Еш жерде ресми тіркелмесе де, олар да медициналық көмекке тегін жүгінуге, зейнетақы алуға құқылы. Ол үшін, табысын заңдастырғаны жөн,-дейді мамандар. Жұмыспен қамту орталықтарына барып, ресми тіркелсе оларға үш ай көлемінде жұмыс орнын тауып береді. Олай болмаған күнде медициналық сақтандыру қорына ең төменгі еңбекақының 5 пайызын өз бетінше аударып тұруы тиіс. Мұның барлығы бүгінгі форумда айтылды. Қатысушыларға "Атамекен" ұлттық кәсіпкерлер палатасының облыстық филиалы атынан арнайы сертификаттар берілді.