Еуропада белең алған қызылша дертінен қалай сақтанамыз? Бүгін М. Оспанов атындағы Батыс Қазақстан мемлекеттік медициналық университетінде осы тақырыпқа арналған семинар өтті. Эпидемиологтар жиынға балабақша, мектеп басшыларын шақырған. Желтоқсаннан бері облыста қызылша 10 адамнан анықталды. Барлығына қажетті ем-дом жасалды. Ауа арқылы тарайтын инфекцияның жайылуы тез. Украинада соңғы мәлімет бойынша, қызылшадан биыл 5 адам көз жұмған. Былтыр жұқпалы ауру бұл елде 18 науқасты ажал құштырған болатын. Жаңа жыл басталғалы 3 апта ішінде 3 мың 450 украиналыққа қызылша жұғып үлгерді. Оның 2 мыңға жуығы бала. Өзіміздің елде де биылдыққа қызылша жұқтырудың 594 жағдайы тіркелді. Жартысынан көбі 14 жасқа дейінгі балалар. Негізінен қызылшаға қарсы уақытында егілмеген балалар ауырып жатыр. Бүгін айналадағы жағдайларды ескеріп, облыстық қоғамдық денсаулық сақтау департаментінің эпидемиологтары семинар өткізді. Бақша, мектеп басшыларына жұқпалы дерт туралы жан-жақты ақпарат берілді.Қызылшаға қарсы вакцина бір жаста және алты жаста екі рет егіледі. Желтоқсан айынан бері облыста 10 адам қызылша жұқтырған. Оның біреуі ересек. 9-ы 14 жасқа дейінгі бала. Алтауы әлі бір жасқа толмағандықтан екпе алмаған. Екі баланың екпесі денсаулығына байланысты кейінге шегерілген. Бір жағдайда ғана ата-анасы вакцинациядан бас тартқан. Қызылша вирусы ағзаға тыныс жолдары арқылы еніп, кілегейлі қабатында көбейеді. Одан кейін қан арқылы тарап, ішкі ағзаларды зақымдайды. Дерт асқынып, дұрыс ем көрсетілмеген жағдайда адам өліп кетуі мүмкін. Кішкентай балалар ауруды жеңіл қабылдайды. Қызылшамен бала күнінде ауырғандарда дертке қарсы иммунитет қалыптасады. Ол адам екінші қайтара бұл вирусты жұқтырмайды.