Мұнай ұрлығына қатысты ұйымдасқан қылмыстық топтың айыптау актісін оқу жалғасып жатыр. Облыстық қылмыстық істер жөніндегі мамандандырылған ауданаралық сотында үш прокурор айыптау қорытындысын кезек-кезек оқыды. Сотталушылар 2003-2016 жылдардағы қылмыстық істер бойынша жауап береді. Бүгін прокурор "Төрт ағайынды" деген атпен тұрақты қылмыстық топ құрған қылмыс әлемінің серкесі Еркін Ізбасарға қатысты айыпты оқыды. Еркін Ізбасар Байғанин аудандағы кен орындарынан аса ірі көлемде бірнеше жыл бойы мұнай ұрлап, тасымалдаған. Құжатсыз сатқан. Қылмыстық топ мүшелеріне компания өкілдері мен күзетшілер көмектескен. Оған Қылмыстық кодекстің
«Ұйымдасқан топ, қылмыстық ұйым құру және оларға басшылық ету, сол сияқты оларға қатысу», «Қаруды, оқ-дәрiлердi, жарылғыш заттарды және жарылыс құрылғыларын заңсыз иемдену, беру, өткiзу, сақтау, тасымалдау немесе алып жүру», «Ұрлық», «Мұнайдың және мұнай өнiмдерiнің шығарылу заңдылығын растайтын құжаттарсыз оларды тасымалдау, иемдену, өткiзу, сақтау, сондай-ақ мұнайды қайта өңдеу», «Билік өкіліне бағынбау» секілді бірнеше бап бойынша айып тағылып жатыр. Сотталушылардың мүддесін 40-тан астам адам қорғайды. Қорғаушы ретінде адвокаттармен бірге сотталушылардың туыстары мен заңды өкілдері де бар. Дені - 2016 жылдың қараша, желтоқсан айларында ұсталған. Оқиғаға қатысты күдіктілердің арасында Ақтөбе облысының ішкі істер департаменті бастығының 1 орынбасары болған 55 жастағы Рахат Ақанов та бар. Ақанов Қылмыстық кодекстің «Лаузымын теріс пайдалану» бабы бойынша айыпталып жатыр.