Барымташылардан әбден мезі болған Әйтеке би ауданындағы шаруа қожалықтарының иелері әскерилендірілген күзет талап етеміз деп отыр. "Құлагер" ЖШС-нің құрылтайшысы Қабидолла Жүсіповтің сөзінше сиырды айтпағанның өзінде жыл сайын ауылдан 70-80 бас жылқы ұрланады. Қожалық иесінің бұлай деп ашуға мінуінің себебі бар. Өйткені, 2017-ші жылы бар-жоғы 40 үй түтін түтетіп отырған Талдық ауылынан 70 бас жылқы жоғалған. Былтыр да ұрылар ауылдан 70 бас жылқыны айдап әкеткен. Былтыр 13 жылқысы жоғалып, Әйтеке би аудандық полиция бөліміне арызданғанда, ондағылар тергеуші жетіспейді деген түрлі сылтаулар айтып, шығарып салған. Полициядан қайран жоғын біліп, ірі қара малдарын іздеуге өзі кіріскен. Тапқан да. Мұғалжар ауданының Құмжарған селосында сатылған. Тірілей біреуін алып қайтқан. Екеуінің сойылғанын білген. Тіпті ұрланған жылқылары садақаларға сойылып кеткен. Қожалық иелерінің көбі үйір-үйір жылқыларынан айырылып жатса да полицияға арыздануға қорқады дейді Қамидолла Жүсіпов. Өйткені айналып келгенде өздерін кінәлі қылып шығарулары ғажап емес. Мал ұрлығының өңірімізде өршіп тұрғаны жасырын емес. Облыстық полиция департаменті басшылығының өз есебінде де мәселе жиі айтылады. Тіпті, осы полиция өкілдерінің өздері жайылымдарды бейнебақылауға алайық, ірі қара малдарға белгі бергіш чиптар салайық деген идеялар айтқан. Бірақ, мал ұрлығының неліктен ашылмайтыны, тергеу амалдарының неліктен нәтижесіз екені ашып айтылмай келеді. Бүгінгі мәселені облыстық полиция департаментінің бастығы Махамбет Әбисатов өз бақылауына алатынын жеткізді. Тағы бір ақтөбелік қаладағы автотұрақтардың аздығына шағымданды. Махамбет Әбисатов жол сақшыларына көлігін кез-келген жерге қойып кететін жүргізушілерді аулауды таңертең жүргізуді тапсырды.