Әлия Молдағұлова көшесіндегі №64 үйдің тұрғындары қыста жылусыз қалуы мүмкін. Тапсырылғанына бес жыл толмаған көп қабатты үйдің жылу құбырлары жарылып тұр. Жөндеу жұмыстарына 9 млн теңге керек. Мұндай қомақты қаржыны жинай алмаймыз деп шырылдаған тұрғындар бүгін біздің редакциямызға шағымданды. 2014 жылы салынған бұл үйге 85 отбасы қоныстанған. Бес қабатты элиталы үйде көбінесе зейнеткерлер, көпбалалы жанұялар тұрады. Тұрғындардың айтуынша, соңғы екі жылдан бері жаңа үйдің жағдайы нашарлаған. Жарық жиі өшіп, су беру шектелгенін қоспағанда былтыр жарытып жылу да қосылмаған. Жұртшылық қыс қатты болмады, әрі үйдің өзінің жылылығымен шықтық дейді. Көпқабатты үйдің құжаттары тапсырыс беруші мен тапсырушы компания арасында қалған. Тұрғындар үйдің техникалық куәлігін жақында ғана алған. Құжат дұрыс рәсімделмеуі себепті екі жылдан бері "Трансэнерго" АҚ толықтай үйге қызмет етуді кешеуілдетіп келеді. Қордаланып қалған мәселелерін айтып тұрғындар қалалық әкімдіктен көмек сұрап отыр. Қалалық тұрғын үй қатынастары бөлімінен нақтыланғандай, бұл жекенің иелігіндегі көпқабатты үй. Әкімдік жылу құбырларын жөндеуге қаражат бөлуге міндетті емес. Тек тұрғындар жазбаша арыз берген жағдайда құзырлы мекемелерге тексеру жүргізу жөнінде сұраныс түсіруге уәде етті. Сондықтан тұрғындардың үйге қызмет көрсетпей отырған тапсырушы мекемені сотқа беруден басқа амалдары қалмаған секілді.