Аталған көкөністің тапшылығы мен қымбаттауының алдын алу мақсатында 3600 гектар жерге картоп егілген. Диқандар жоспар бойынша 106 мың тонна картоп жинамақ. Ақтөбелік шаруалар көкөніс жинау науқанын 1 апта бұрын бастады. Биыл облыста 3600 гектар жерге картоп егілсе, 4,5 мың гектар жерге өзге көкөніс түрлері салынған. Одан 35 мың тонна картоп, 58 мың тонна өзге көкөніс жиналды. Облыстық ауыл шаруашылығы басқармасы басшысының орынбасары Асылхан Әбтиевтің сөзінше картоп бітік шыққан, диқандар әр гектардан 25 тоннадан артық картоп жинапты. Биыл жазда көкөніс бағасы шарықтады. Мәселен, сәбіздің келісі 500 теңгеден, картоптың келісі 300 теңгеден сатылғанын ешкім ұмыта қойған жоқ. Шенеуніктер картоптың жеңсік асқа айналмауы үшін тұрақтандыру қорын осы өніммен толтырмақ. Облыстық бюджеттен тұрақтандыру қорына көкөніс салу үшін 87,3 миллион теңге бөлініпті. "Пригородный" ЖШС қорға 2000 тонна картоп, 200 тонна сәбіз, 233 тонна пияз салмақ. Тұрақтандыру қоры аталған серіктестіктен картопты келісіне 62 теңге, сәбізді 64 теңгеге сатып алған. Облыстық ауыл шаруашылығы басқармасының бөлім басшысы Снежанна Кулекенованың сөзінше, келесі жылы да сәбіз тапшылығы болуы мүмкін . Биыл алқаптардан 106 мың тонна картоп, өзге көкөніс түрлерінен 84 мың тонна өнім алынбақ. Облыстық бюджеттен шаруаларды субсидиялауға 1,3 миллиард теңге бөлінген. Қаламыздағы гипермаркеттің бірінде келісі 184 теңгеге сатылып жатқан картоптың бағасы сапасына сай емес. Ал сәбіздің келісі 153 теңге, пияздың келісі 117 теңгеге, қызылша 275 теңгеден саудалануда.